عاجل خناقة شوبير مع مجلس الادارة

أكد الإعلامي الأحمر أحمد شوبير إن نادي الزمالك دخل في محاولات مكثّفة لإغلاق ملف اللاعب صلاح مصدق بعدما قام الأخير بفسخ عقده نتيجة عدم حصوله على مستحقاته المالية.

وقال شوبير في تصريحات عبر برنامجه الإذاعي صباح اليوم الأربعاء: “الزمالك بيحاول يعمل اتصالات مع صلاح مصدق فسخ عقده ومشي عشان خلص المهلة وماخدش فلوسه، فالإدارة بتحاول يعني توصل لحل ودي معاه عشان ما يصعّدش، عشان ما يشتكيش. يعني طب إنت هتاخد المستحقات المتأخرة وما تطالبش بعقدك بالكامل ولا تعمل شكوى ضد النادي، ويعملوا مخلَّصات ويقفلوا الملف ده”.

وتابع: “إزاي يعني؟ ما حد يقول لي إزاي؟ ما هو يا جماعة مش معقول! يعني ادّيله فلوسه، ادّيله مستحقاته… إيه المتأخر؟ بس ما ياخدش عقده بالكامل؟ إذا كانت الظروف في إيده بتقول إنه ياخد عقده بالكامل، واللوايح في صفه”.

وواصل: “طب إنت ما اديتوش ليه مستحقاته وهو موجود أصلًا وهو بيلعب؟ وتيجوا تزعلوا لما نتكلم ونقول كلمتين؟ الله! هو في إيه يا جماعة؟ ما هو إنت برضه لازم تكون دارس حساباتك كلها وخطواتك كلها أول بأول وإنت بتتعاقد أو بتفسخ، أو اللعيب بيعمل مشكلة”.

وأشار: “هو عنده عقد، هو عنده مستحقات… قاعد يقول لك: اديني مستحقاتي، اديني مستحقاتي، اديني مستحقاتي… لا اعتمدتوا إنه لا ده صلاح ده جميل ولا متربي في الزمالك. دايمًا بقول لك: لا هو متربي في الزمالك، ولا وسام أبو علي كان متربي في الأهلي وبيدوب في دباديب مختار التتش، وده بيدوب في دباديب حلمي زامورا. دول لاعيبة محترفين… لاعيبة أكل عيشهم كرة القدم. ما حدش يزعل من الكلام ده”.

وأوضح: “فلما جه أبو علي عرض في أمريكا والناس قالوا لا مش هيضحي بالأهلي… ليه؟ هو جاله حاجة بالنسباله أحسن، فمشي وتوكل على الله. صلاح مصدق قال لك: هات لي فلوسي… إنت ما اديتوش الفلوس! عمل لك الأول تحذير، وبعدين عمل لك إنذار، وبعدين عمل لك شكوى، وبعدين مشي وفسخ العقد. وإنت عارف إن القرار أو القانون معاه في صفه”.

وأردف: “يا جماعة… ما تتكلموا جد! يعني إنتوا بتزعلوا ليه لما الواحد يتكلم في الحاجات دي؟ يقولوا لك ما تتكلمش على مش عارف مين… إحنا بنتكلم على الحالة اللي موجودة… الحالة اللي موجودة إنه لعيب فسخ عقده ومشي. وبعد ما مشي تقول له: طب خلاص أنا هدي لك مستحقاتك المتأخرة بس ما تشتكيش؟”.