عاد اسم اللاعب أحمد عيد ليتصدر المشهد من جديد بعد انتشار أحاديث كثيرة خلال الساعات الأخيرة عن اقترابه من العودة لنادي الزمالك، الأمر الذي دفع الإعلامي أحمد شوبير لتوضيح القصة كاملة وكشف كواليس موقف النادي الأبيض.
وقال شوبير في تصريحاته عبر برنامجه الإذاعي صباح اليوم الخميس: “ظهر كلام كتير جدًا الساعات اللي فاتت عن انضمام أحمد عيد لصفوف الزمالك. والغريب إن أحمد عيد كان لاعب في الزمالك أصلاً، والولد فضّل فترة طويلة يطلب فرصة للّعب، ومحدش ادّاله الفرصة.”
وتابع: “الولد مشي وراح الإسماعيلي، والإسماعيلي كمان مشّاه، وبقى فترة من غير نادي خالص… وفضل يدوّر ويلف لحد ما استقر في المصري، وهناك حسام حسن اختاره وبدأ يعتمد عليه أساسي، والولد الحقيقة تألق بشكل كبير سواء مع المصري أو المنتخب الأولمبي.”
وأضاف شوبير: “الناس في الزمالك بيقولوا إن لحد دلوقتي مفيش تحديد للاحتياجات، وكل حاجة هتتحدد بعد ما المدير الفني الجديد يستلم ومعرفة هل هيترفع إيقاف القيد ولا لأ، وده مرتبط بالموقف المالي للنادي. وقالوا إن أي تعاقدات هتكون حسب الإمكانيات في يناير.”
واستكمل: “لحد دلوقتي مفيش تفاوض رسمي بين إدارة الزمالك وأحمد عيد… لكن فيه كلام كتير حوالين الموضوع. لو الأزمة اتحلّت، اللاعب ممكن يكون موجود مع الفريق. والولد نفسه ماشي خطوة خطوة وبيأدي كويس جدًا مع المصري.”
واختتم: “المهم إنه يرجع بالسلامة بعد إصابته… وربنا يشفيه ويكمل تألقه.”
