وجه الإعلامى أحمد شوبير حارس مرمى الأهلى ومنتخب مصر السابق صدمة قوية لجماهير نادى الزمالك بعدما كشف عن أن هناك إيقاف قيد جديد مرتقبا يهدد النادى بسبب 3 لاعبين.
وقال أحمد شوبير فى تصريحات إذاعية اليوم الاثنين: «فاكرين عمر فرج اللاعب الفلسطينى اللى الزمالك ضمه وكانت صفقة سوشيال ميديا فقط، عشان قالوا ساعتها إن الأهلى بيفاوضه، فقال لك فى الزمالك طب يلا نجرى ناخده، وبالفعل تعاقد الزمالك معاه ولعب عدة دقائق فقط مع النادى، وبعد كده النادى أعاره السنة اللى فاتت لنادى أيك السويدى وخلصت الإعارة ورجع تانى فإيه بقه اللى حصل؟.
وأوضح شوبير: «عمر فرج قال لهم أنا قاعد وعايز فلوسى قالوا له ملكش حاجة عندنا، قال لهم هشتكى قالوا اشتكى فاشتكى والفيفا حكم له بمليون و100 ألف دولار، الزمالك يروح محكمة رياضية ميروحش بقه ملوش لازمة وكمان 5 فى المائة فائدة من يوليو الماضى و25 ألف دولار تكاليف الإجراءات أمام الفيفا، يا دى الشغلانة يا ولاد.
وتابع شوبير: «كمان غرفة تسوية المنازعات فى الفيفا حكمت للاعب البولندى كونراد ميشلاك بـ 503 آلاف دولار من فبراير 2025 يعنى بقالنا سنة دلوقتى بقوا 700 ألف دولار، يبقى أدى 700 ألف ومليون و125 كده مليون و825 ألف دولار.
وأضاف شوبير: «خلاص كده لأ لسه، سامسون أكينولا فاكرينه اللى الكل قال ده غير مناسب لنادى الزمالك، وأى مهاجم فى أشبال الزمالك أفضل منه، قالوا لك لأ ده هيكسر الدنيا، له 340 ألف دولار وفيه فائدة 5 فى المائة من ديسمبر 2024.
واختتم شوبير: «دلوقتى الزمالك عمل استئناف وغالبا هيترفض، ولو اترفض هيروح الزمالك لإيقاف القيد من جديد، ولسه عندك قضية إبراهيما نداى اللى لسه لحد دلوقتى مدخلتش فى الإيقاف، الأمور أصبحت من سيئ إلى أسوأ ونتمنى الأمور تعدى على خير مع نادى الزمالك.
